Walt Whitmanek
bihotza non duzun jakin nahi baduzu,
esnaturik amesten duzunean zure burua nora doan begira ezazu esan zuen
eta
Walt Whitmani ez, zuri,
burua non duzun jakin nahi bazenu,
esnaturik ametsak gorpuzten dituzunean zure bihotza nora doan begira dezazula esaten dizut.
Noizbait potoren bat egin dut,
topoarena inoiz ere ez
eta topoak pairatu askotan.
Nire ama
erditu ninduen bezala
zure ama erditu zintuen,
baina
amari nor dabil
begiak zabaltzen
eta nor ixten.
Bitxia,
oso bitxia, oso,
batzuetan,
pentsatzen eta birpentsatzen gabiltzan arren
burura ideiek ez datozkigu
edo burura datozkigunak burutik dihoazkigu,
bitxia,
oso bitxia, oso,
bestetan,
pentsatzen ez gauden arren
burura ideiak etortzen zaizkigu
eta burutik alde egin barik geure buruan geratzen dira
oso bitxia, oso,
bitxia.
Txiki eta gazte nintzenean
gabonak gabonak zirenez
gabonetako bazkariak zein afariak
gabonak bezalaxe bazkari zein afari onak ziren,
gero, gaztetasunetik heldutasunerako bidean
gabonak ziren gabonak gabonak izaten uzten hasi ziren
eta gabonetako bazkariak eta afariak gabonetako bazkari zein afari uzten hasi ziren ere,
geroxeago, orain,
heldutasunaren goian
gabonak uzten hasi ziren gabonak ezta gabonak direnez
gabonetako bazkariak eta afariak uzten hasi ziren gabonetako bazkariak eta afariak ezta gabonetako bazkariak eta afariak ezta diren bezala,
gabonetan eta gabonetako bazkari eta afarietan
gero eta mahai-lagun gutxiago geratzen zaizkidan bezala
gero eta mahai-etsai gehiago dauzkat.
Beraz, Jainkoak epaitu gaitzala.
Laboatarra
sugearekin eta
aizkorarekin.
Bakean eta bakerako jesartzen zena
gerran eta gerrarako jesartzen zirenen
erasoak jasaten bazuen ere
bakean eta bakerako jesartzen zen
eta ikusi beharko da berriz jesartzen bada
bakean eta bakerako edo autodefentsarako eta kontraerasorako
jesartzen den ala ez,
ordea,
gerran eta gerrarako jesartzen zirenak
zelan eta zertarako altxatzen ziren
eta zelan eta zertarako jesarriko dira?
E, errege mago,
agindu judiziala barik
etxea eta komunikazioak,
beste gauza askoren artean,
bortxaezinak dira
eta galdetu iezaiozu CNI-ri ez, FBI-ri ere ez,
Aita Santuari edo geldiezinari hobe
etxea eta komunikabideak,
beste gauza askoren artean,
nortzuk eta noren agindupean bortxatu dituzte,
e, errege mago.
Edozeini
zeure bihotza emateko
ero egon behar,
baina
maitatzen zaituenari
bihotza apurtzeko
edo zure bihotza
ez oparitzeko
ero egon behar ere.
Bai batzuek
eta bai besteek
gauza txar bera
egiten jarraitzen dutenez,
aldatu duen bakarra
neu naiz
eta nire aldaketa
eurekin baino
nirekin bakean egotea litzateke.
GILLERMO ANSORENA 