Sorterritik hilerrira garamatzan bidea
malkoz malko eta barrez barre
ibili beharko dugu
eta
sorterritik hilerrira garamatzan bidea
malkoz malko eta barrez barre
ibili eta gero
hilerritik sorterrira dakarkigun bidea
malkoz malko eta barrez barre
ibili beharko dugu ere.
Beraz,
zorionekoak gu.
Bizirik dauden hitzek
hil dezakete
eta hil daitezke
eta
hilik dauden hitzek
berpiztu ahal dute
eta bizi ere.
Irakurri nahiko nukeena
idatzi arte
idazteari ekingo diot
eta gero
idatzi nahiko nukeena
irakurri arte
irakurtzeari emango nioke
edo alderantziz izan daiteke?
Okupak izatetik
eta eraikinak okupatzetik
kaletarrak izatera
eta kaleak hartzera:
hortxe daukagu iraultza.
Xanpain botila,
kortxoa kendu eta
danba eta aparra.
E, lore polit eta lirain hori,
nire hitzak erleak balira
eta bertsoak erleen hegalak,
zure lore hautsa
oinetan
loretik loreetara
eramango lituzkete,
nire hitzak erleak balira
eta bertsoak erleen hegalak,
e, lore polit eta lirain hori.
Olerkariok
ez begirik, ez belarririk ezta ahotsik ez dituztenen
begiak, belarriak eta ahotsak
baldin eta bagara,
ikusi, entzun eta hitz egin beharko genuke
jakinik
itsuak, gorrak eta mutuak
nahi gaituztela.
Triste sentitu
zaitezke, baina alaitu
zaitez barrezka.
Olerkia eta
musika bat eginez
zoragarria.
Ortua mimoz
landuz bereganatu
duzun fruitua.
GILLERMO ANSORENA 