Bi erru

Naizena izan guragatik

zer errua daukat nik

eta

ez naizena izan ez guragatik

zer errua daukat nik.

Aurkakoak

Erregeen koroetatik

baserritarren txapeletara

bi mundu ezberdinen aldea dago.

Nahigabe eta nahita

Sokatik

hamaika aldiz

nahigabe

jausi den funanbulista naiz,

baina

oraingoan

sokatik

lehen aldiz

nahita

jausi daitekeen funanbulista naiz.

Baino lehen eta ondoren

Ez dut gogoratzen

idatziko dudana

jadanik idatzi dudan edo ez,

baina aita hil zitzaigunetik

bere heriotzari buruz

norbaitekin

hitz egin dudanean

guztiei gauza bera esan diet:

aitaren heriotza baino lehen

hausten den beirazko kopa bat bezala

mila zatitan hautsiko nintzela uste nuela

eta

aitaren heriotzaren ondoren

nire barruan

Gernikako arbolaren enbor gogorregia neukala

antzeman dudala.

Bilatzeaz eta aurkitzeaz

Nigan

bilatzen zabiltzatena

ez duzue aurkituko

eta

nigan

aurkitu dezakezuena

ez zaudete bilatzen.

Bat behintzat

Erori

eta altxatu,

altxatu

eta erori:

bizitzaren funtsenetariko bat.

Posible, baina…

Gehiago

eta hobeago

idaztea ahal da,

nola ez,

baina

gehiago

eta hobeago

idazteko

gehiago

eta hobeago

idatzi behar da.

Idazleetatik idazleetara

Idazten baino ez

lan egiten duten

idazleak badaude

eta

idazten

lan egiteaz gain

lantegian lan egiten dugun idazleok bagaude ere.

Atsedenez

Atsedena gehien

merezitzen duenak

oporrik gabe

beste behin ere

eta

atsedena gutxien

merezitzen dutenek

oporrekin

beste behin ere.

Dakidan gauza bakarra

Atzo lagun on bati

nahi duenerako naukala

esan nion,

baina

politikarako izan ezik

esatea

ahaztu zitzaidan.